<p>கதாநாயகன் தினேஷும் (ஜுனைத் கான்), நாயகி மீரா ரங்கநாதனும் (சாய் பல்லவி) ஒரே ஐடி நிறுவனத்தில் பணிபுரிகிறார்கள். மீராவை ஒருதலையாக காதலிக்கிறார் தினேஷ். </p><p>அந்நிறுவனத்தின் ஊழியர்கள் அனைவரும் ஜப்பானுக்கு டூர் செல்கிறார்கள். ஜப்பானுக்குச் செல்ல வேண்டும் என்பது மீராவுக்குச் சிறு வயதிலிருந்தே ஆசை.</p><figure><img alt="Ek Din Review | ஏக் தின் விமர்சனம்" src="https://gumlet.vikatan.com/vikatan/2026-05-01/d3axoo7b/Ek_Din___Official_Trailer___Sai_Pallavi___Junaid_Khan___Aamir_Khan_Productions___01st_May_2026_1_58_.jpg" /><figcaption>Ek Din Review | ஏக் தின் விமர்சனம்</figcaption></figure><p>ஆனால் அங்கு நடக்கும் ஒரு விபத்தினால் மீராவுக்குத் தற்காலிக நினைவாற்றல் இழப்பு ஏற்படுகிறது. அதனால், சமீபத்திய நினைவுகள் ஒரு நாள் முழுவதும் அவரின் நினைவுக்கு வராது. அதற்கு அடுத்த நாள் நினைவு திரும்பிவிடும்.</p><p>இந்த ஒரு நாளில் நடக்கும் சம்பவங்கள் என்னென்ன, இந்த ஒரு நாளில் தினேஷ் தனது காதலை வெளிப்படுத்தினாரா என்பதுதான் சுனில் பாண்டே இயக்கியிருக்கும் இந்த பாலிவுட் படத்தின் கதை.</p><p>இன்ட்ரோவெர்ட் (அகவயத்தன்மை) குணாதிசயத்துடன், தன் மீது நம்பிக்கை இழந்தவராக, தாழ்வு மனப்பான்மை உடையவராக, நடுக்கம் கலந்த உடல்மொழியை நடிப்பில் பக்குவமாகச் சேர்த்திருக்கிறார் நாயகன் ஜுனைத் கான். ஆனால், எமோஷனல் காட்சிகளில் உயிர்ப்பற்ற நடிப்பைத் தந்து போவது ஏமாற்றம் ஜுனைத்! </p><figure><img alt="Ek Din Review | ஏக் தின் விமர்சனம்" src="https://gumlet.vikatan.com/vikatan/2026-05-01/u5mjpfug/Ek_Din___Official_Trailer___Sai_Pallavi___Junaid_Khan___Aamir_Khan_Productions___01st_May_2026_1_23_.jpg" /><figcaption>Ek Din Review | ஏக் தின் விமர்சனம்</figcaption></figure><p>காதலில் ஏற்படும் ஏமாற்றம், அது உண்டாக்கும் வலி என எமோஷனல் களத்தில், தனது பணியைச் செவ்வனே செய்திருக்கிறார் சாய் பல்லவி. </p><p>ஜப்பானைச் சுற்றிப் பார்க்க வேண்டும் என்ற சிறு வயதுக் கனவு சாத்தியப்படும் தருணத்தில் நடிப்பில் பூரிப்பையும் ஏற்றியிருக்கிறார். </p><p>அனுதாபத்தின் வழி மீராவை அடைய நினைப்பவராக குணால் கபூர் கொடுத்த வேலையை மட்டும் செய்துவிட்டுப் போகிறார்.</p><aside><a href="https://cinema.vikatan.com/mollywood/mammootty-mohanlal-fahad-fasil-nayanthara-starrer-patriot-movie-review">Patriot Review: ஒட்டுக்கேட்கும் ஸ்பைவேர், கேள்விகேட்கும் மம்மூட்டி, மோகன்லால்; சேட்டன்களின் அடிபொலி!</a></aside><p>நொய்டாவின் ஐடி நிறுவன வளாகங்களையும், பனி மூடியிருக்கும் ஜப்பானையும், கொண்டாட்டம் நிறைந்த அதன் முக்கியச் சுற்றுலாத் தளங்களையும் நேர்த்தியுடன் பிரேமுக்குள் புகுத்தியிருக்கிறார் ஒளிப்பதிவாளர் மனோஜ் லோபோ. </p><p>ஒரு நாள் காதல் கதையைத் தொய்வின்றிச் சொன்ன விதத்திற்கு வெல் டன் சொல்ல வைக்கும் படத்தொகுப்பாளர் பல்லு சலூஜா, சுற்றி வளைத்துச் சொல்லும் க்ளைமாக்ஸை நேரடியாகச் சொல்லியிருக்கலாம். </p><figure><img alt="Ek Din Review | ஏக் தின் விமர்சனம்" src="https://gumlet.vikatan.com/vikatan/2026-05-01/bbvicdfn/Ek_Din___Official_Trailer___Sai_Pallavi___Junaid_Khan___Aamir_Khan_Productions___01st_May_2026_1_3_s.jpg" /><figcaption>Ek Din Review | ஏக் தின் விமர்சனம்</figcaption></figure><p>பனி வீசும் களத்தில் நகரும் காதல் கதைக்கு மென்மையான தூறலைப் போன்ற பின்னணி இசையைத் தந்திருக்கிறார் இசையமைப்பாளர் ராம் சம்பத். பாடல்களில் குறை இல்லை என்றாலும், அவற்றில் சில கதைக்குத் தடை போடும் கருவியே!</p><p>கிராபிக்ஸ் உதவி பெரியளவில் இப்படத்திற்குத் தேவைப்படவில்லை என்றாலும், 'ஃபார்ட்யூன் பெல்' உள்ளிட்ட ஓரிரு விஷயங்களை கிராபிக்ஸ் மூலம் சாத்தியப்படுத்தியிருக்கிறார்கள். ஆனால், அதன் தரத்தை கவனித்திருக்கலாம்.</p><blockquote>2016-ம் ஆண்டு வெளிவந்த `ஒன் டே' என்கிற தாய் மொழிப் படத்தின் அதிகாரப்பூர்வ ரீமேக்தான் இந்த `ஏக் தின்'. நாயகிக்குச் சமீபத்தில் நிகழ்ந்த நிகழ்வுகள் எதுவும் நினைவில்லாத ஒரு நாள், அந்த நாளில் தனது காதலுக்கு உருவம் தரும் ஒரு இன்ட்ரோவெர்ட் நாயகன் என்கிற ஒன்லைனைக் கொண்டு கதையை நகர்த்தியிருக்கிறார் இயக்குநர் சுனில் பாண்டே.</blockquote><figure><img alt="Ek Din Review | ஏக் தின் விமர்சனம்" src="https://gumlet.vikatan.com/vikatan/2026-05-01/8pc7igt1/Ek_Din___Official_Trailer___Sai_Pallavi___Junaid_Khan___Aamir_Khan_Productions___01st_May_2026_0_58_.jpg" /><figcaption>Ek Din Review | ஏக் தின் விமர்சனம்</figcaption></figure><p>கதாநாயகன், தன்னைப்பற்றிய சுய விளக்கங்கள் தந்தபடி திரைக்கதைக்குள் நுழையும் இப்படம் ஆர்ப்பாட்டமில்லாமல் மிதமான வேகத்தில் முதல் 30 நிமிடங்களைக் கடக்கிறது. </p><p>பிறகு ஜப்பானுக்கு டேக் ஆஃப் ஆகும் கதையும் மாற்றமில்லாத அலைவரிசையிலேயே செல்கிறது. நாயகிக்கு ஏற்படும் விபத்து, அதனால் வரும் மெமரி லாஸ் எனச் சோதனை பனி மூட்டத்திற்குள் சிக்கி, களைப்பை முறிக்க வைக்கும் திரைக்கதை, தட்டுத்தடுமாறித் தடைக்கோட்டைத் தாண்டுகிறது.</p><aside><a href="https://cinema.vikatan.com/kollywood/kara-movie-dhanush-mamitha-baiju-vignesh-raja-review">Kara Review: 90களின் தொடக்கத்தில் ஒரு ஹெய்ஸ்ட் த்ரில்லர்; தடுமாறாமல் கரைசேர்கிறாரா இந்த கரசாமி?</a></aside><p>ஒரு நாள் மட்டும் சமீபத்திய நிகழ்வுகளை மறந்துவிடும் நாயகி, அன்றைய நாளில் தான் வாழ நினைத்த வாழ்க்கைக்குத் தினேஷ் உயிர் தரும் படலம் நெகிழ்ச்சியூட்டும் பகுதி!</p><p>நாயகி எங்கே நாயகனின் உண்மை முகத்தைக் கண்டுபிடித்துவிடுவாளோ என்கிற கதையை லேசான பரபரப்போடு நகர்த்தியிருப்பதும் அழகு!</p><figure><img alt="Ek Din Review | ஏக் தின் விமர்சனம்" src="https://gumlet.vikatan.com/vikatan/2026-05-01/qd2tklqg/Ek_Din___Official_Trailer___Sai_Pallavi___Junaid_Khan___Aamir_Khan_Productions___01st_May_2026_0_43_.jpg" /><figcaption>Ek Din Review | ஏக் தின் விமர்சனம்</figcaption></figure><p>தான் வாழ நினைத்த வாழ்க்கையை வாழ்ந்துவிட்டதாகத் திருப்தி கொள்ளும் நாயகன் தியாகி பட்டம் வாங்கிக்கொள்வது, பிறகுத் தன் காதலைத் தெரியப்படுத்துவதற்கு வேண்டுமென்றே அவரே செய்யும் வேலையெல்லாம் குழப்பங்களின் குவியலே!</p><p>அதோடு நம்பகத்தன்மையில்லாத நிகழ்வுகளோடு சுற்றிக்கொண்டே வரும் க்ளைமாக்ஸும், தலை சுற்ற வைத்து நமக்கு மெமரி லாஸ் உண்டாக்கும் எபிசோடு.</p><blockquote>ஒரு நாள் காதல் கதை நம்மைக் கவர்ந்தாலும், சமகால சினிமாவுக்கேற்ப ரீமேக்கை மாற்றியிருந்தால், இந்த `ஏக் தின்'னை, என்றும் நிலைத்து நிற்கும் காதல் படைப்பாகக் கொண்டாடியிருக்கலாம்.</blockquote><br>
<br>
from Movie Review | திரை விமர்சனம் <br>
Umn news <a
